Суриянинг собиқ президенти Башар Асадга тегишли ноёб автомобиллар Дамашқда ўтказилаётган кимошди савдосида сотувга қўйилди. Улар орасида Ferrari, Lamborghini ва Mercedes-Benz каби машҳур брендларнинг махсус моделлари мавжуд.
“Ynetnews” хабарига кўра, аукционда сотувдан тушган маблағлар Сурия тараққиёт фондига йўналтирилади.
Аукционда Суриянинг янги президенти Аҳмад аш-Шараъа ҳам иштирок этиши кутилмоқда.
Дастлабки босқичда қуйидаги учта суперкар савдога чиқарилди:
Ferrari F50 — 3–4 миллион доллар қийматга эга, атиги 349 дона ишлаб чиқарилган. 4,7 литрли, 520 от кучига эга V12 двигатель билан 3,7 сонияда 100 км/соат тезликка чиқади;
Mercedes SL65 AMG Black Series — 670 от кучига эга, 300 дона ишлаб чиқарилган, баҳоси 500 минг доллар атрофида;
Audi R8 (биринчи авлод) — 525 от кучига эга V10 двигателли суперкар.
Россияга қочиб кетган Асад тахминан 20 миллион долларлик ўнлаб машиналардан иборат тўпламини ортда қолдирган.
Келажакда Ferrari F12 TDF, Lamborghini Countach, Mercedes 600 W100 каби бошқа ноёб моделларнинг ҳам савдога чиқарилиши режалаштирилган.
