Бугун 14 апрель куни Президент Шавкат Мирзиёев номига қозоғистонлик маслакдоши томонидан мактуб келди. Бу ҳақда мамлакат раҳбарининг матбуот хизмати маълум қилиди.
Мактубда Қозоғистон етакчиси Ўзбекистоннинг Бухоро шаҳрига қилган сафаридан кейин шаҳар ҳақида ўз таассуротларини ҳамда икки мамлакат ўртасидаги дўстликни янада чуқурлаштириш борасида сўз борган.
Мактубнинг тўлиқ матни қуйида
Ўзбекистон Республикаси Президенти
Шавкат Мирзиёев Жаноби Олийларига
Қадрли Шавкат Миромонович!
Нафақат Марказий Осиё, балки бутун жаҳон цивилизацияси дурдонаси бўлган қадимий Бухоро шаҳрига амалий ташрифим чоғида кўрсатган алоҳида меҳмондўстлик ва самимият учун Сизга чин дилдан миннатдорлик билдираман.
Ўзбекистон бу бебаҳо асраб-авайлаб, бойитиб, буюк ўтмишни замонавий эҳтиёжлар билан уйғунлаштириб келаётгани мени ҳайратга солди. Бухоронинг бугунги гўзал қиёфаси Сизнинг Янги Ўзбекистонни барпо этишга қаратилган оқилона ва бунёдкорона сиёсатингиз юксак самарадорлигининг яққол ифодасидир.
Пухта ўйланган тадбирларга бой ташрифнинг ўзи, шубҳасиз, фойдали бўлди. Назаримда, Бухородаги бир кунлик музокаралар узоқ муддатли сиёсий самараси жиҳатидан расмий ташрифдан асло қолишмайди.
Учрашувимиз Қозоғистон ва Ўзбекистон ўртасидаги кўп қиррали алоқаларни янада мустаҳкамлаш учун янги уфқларни очди, давлатлараро стратегик ҳамкорликни янги мазмун билан бойитишга хизмат қилади.
Остонага қайтгач, эришилган ва тасдиқланган келишувларни амалга ошириш, шунингдек, мамлакатингизнинг турли соҳалардаги фойдали тажрибасини ҳисобга олиш бўйича аниқ топшириқлар бердим. “Тоза ҳаво” қўшма ташаббусига алоҳида аҳамият бераман.
Ишончим комилки, биз қўйган вазифаларнинг сифатли бажарилиши Қозоғистон – Ўзбекистон стратегик шериклиги ва иттифоқчилигини янги чўққиларга олиб чиқишга хизмат қилади.
Қозоғистон учун катта маданий ва тарихий аҳамиятга эга бўлган архив материалларини тақдим этганингиз учун алоҳида миннатдорчилик билдираман. Бу ҳаракат Сизнинг бағрикенглигингиз ва қозоқ халқига бўлган илиқ муносабатингиз, қардош мамлакатларимиз тарихини муносиб эътироф этишингиздан далолат беради.
Ҳурматли Шавкат Миромонович! Сизга ва оилангизга чин қалбимдан сиҳат-саломатлик ва бахт-саодат, Қозоғистоннинг абадий дўсти, иттифоқчиси ва стратегик шериги бўлган Янги Ўзбекистонни барпо этишда янги муваффақиятлар тилайман.
Ҳурмат билан,
Қасим-Жомарт Тоқаев,
Қозоғистон Республикаси Президенти.
Эслатиб ўтамиз, Қозоғистон Президенти Қасим-Жомарт Тоқаев Ўзбекистоннинг Бухоро шаҳрига 10 апрель куни ташриф буюриб, 11 апрель куни Қозоғистонга жўнаб кетган эди.
Қозоғистон президентнинг Бухоро шаҳрига ташрифидан фото лавҳалар:
