Bugun, 14 aprel kuni Prezident Shavkat Mirziyoyev nomiga qozoqistonlik maslakdoshi tomonidan maktub keldi. Bu haqda mamlakat rahbarining matbuot xizmati ma'lum qildi.
Maktubda Qozog‘iston yetakchisi O‘zbekistonning Buxoro shahriga qilgan safaridan keyin shahar haqida o‘z taassurotlarini hamda ikki mamlakat o‘rtasidagi do‘stlikni yanada chuqurlashtirish borasida so‘z borgan.
Maktubning to‘liq matni quyida
O‘zbekiston Respublikasi Prezidenti
Shavkat Mirziyoyev Janobi Oliylariga
Qadrli Shavkat Miromonovich!
Nafaqat Markaziy Osiyo, balki butun jahon tsivilizatsiyasi durdonasi bo‘lgan qadimiy Buxoro shahriga amaliy tashrifim chog‘ida ko‘rsatgan alohida mehmondo‘stlik va samimiylik uchun Sizga chin dildan minnatdorlik bildiraman.
O‘zbekiston bu bebaho asrab-avaylab, boyitib, buyuk o‘tmishni zamonaviy ehtiyojlar bilan uyg‘unlashtirib kelayotgani meni hayratga soldi. Buxoroning bugungi go‘zal qiyofasi Sizning Yangi O‘zbekistonni barpo etishga qaratilgan oqilona va bunyodkorona siyosatingiz yuqori samaradorligining yaqqol ifodasidir.
Puxta o‘ylangan tadbirlarga boy tashrifning o‘zi, shubhasiz, foydali bo‘ldi. Nazarimda, Buxorodagi bir kunlik muzokaralar uzoq muddatli siyosiy samarasi jihatidan rasmiy tashrifdan aslo qolishmaydi.
Uchrashuvimiz Qozog‘iston va O‘zbekiston o‘rtasidagi ko‘p qirrali aloqalarni yanada mustahkamlash uchun yangi ufqlarni ochdi, davlatlararo strategik hamkorlikni yangi mazmun bilan boyitishga xizmat qiladi.
Ostonaga qaytgach, erishilgan va tasdiqlangan kelishuvlarni amalga oshirish, shuningdek, mamlakatimizning turli sohalardagi foydali tajribasini hisobga olish bo‘yicha aniq topshiriqlar berdim. “Toza havo” qo‘shma tashabbusiga alohida ahamiyat beraman.
Ishonchim komilki, biz qo‘ygan vazifalarning sifatli bajarilishi Qozog‘iston – O‘zbekiston strategik sherikligi va ittifoqchiligini yangi cho‘qqilarga olib chiqishga xizmat qiladi.
Qozog‘iston uchun katta madaniy va tarixiy ahamiyatga ega bo‘lgan arxiv materiallarini taqdim etganingiz uchun alohida minnatdorchilik bildiraman. Bu harakat Sizning bag‘rikengligingiz va qozoq xalqiga bo‘lgan iliq munosabatingiz, qardosh mamlakatlarimiz tarixini munosib e‘tirof etishingizdan dalolat beradi.
Hurmatli Shavkat Miromonovich! Sizga va oilangizga chin qalbimdan sihat-salomatlik va baxt-saodat, Qozog‘istonning abadiy do‘sti, ittifoqchisi va strategik sherigi bo‘lgan Yangi O‘zbekistonni barpo etishda yangi muvaffaqiyatlar tilayman.
Hurmat bilan,
Qosim-Jomart To‘qayev,
Qozog‘iston Respublikasi Prezidenti.
Eslatib o‘tamiz, Qozog‘iston Prezidenti Qosim-Jomart To‘qayev O‘zbekistonning Buxoro shahriga 10 aprel kuni tashrif buyurib, 11 aprel kuni Qozog‘istonga jo‘nab ketgan edi.
Qozog‘iston prezidentning Buxoro shahriga tashrifidan foto lavhalar:
