Тошкентнинг Бунёдкор, Себзор, Аҳмад Дониш ҳамда Тошкент ҳалқа йўли ва Янги Ўзбекистон каби бешта кўчаларида тезлик чегарасини 80 км/соатгача ошириш режалаштирилмоқда. Бу ҳақда пойтахт Йўл ҳаракати хавфсизлиги бошқармаси бошлиғи ўринбосари Элмурод Алимов маълум қилди.
Билдирилишича, Тошкентнинг бешта кўчасида автомобиллар учун белгиланган тезликни ўзгартириш ҳамда 12 та кўчада бир томонлама ҳаракатланишни жорий этиш режа қилинмоқда. ЙҲХБ бошлиғи ўринбосари Элмурод Алимовга кўра, 500 та светофор узлуксиз электр таъминоти билан жиҳозланиши мумкин.
«Тошкент шаҳрининг Бунёдкор, Себзор, Аҳмад Дониш ҳамда Тошкент ҳалқа йўли ва Янги Ўзбекистон кўчаларида транспорт воситалари учун чекланган юқори тезлик 80 километрга ўзгартириш таклифини беряпмиз», — деди у.
Шаҳарларда рухсат этилган тезлик чегараси 2023 йил апрель ойида 70 дан 60 км/соатга туширилганди.
Бундан ташқари, 12 та кўчада (аниқ қайсилари экани айтилмаган) бир томонлама ҳаракатланишни жорий этиш таклиф қилинмоқда. Ушбу ташаббус маҳаллий ва хорижий тажриба таҳлили асосида тирбандлик ва йўл-транспорт ҳодисаларининг олдини олиш, ҳаракат хавфсизлигини таъминлаш ва йўл ҳаракати қатнашчиларига қулайлик яратиш мақсадида илгари сурилмоқда.
