Тошкентда янги халқаро аэропорт қурилиши ишлари жорий йил июль ойида бошланиши режалаштирилмоқда. Бу ҳақда транспорт вазири ўринбосари Жасурбек Чориев маълум қилди.
Унинг сўзларига кўра, лойиҳа бўйича давлат-хусусий шериклик (ДХШ) шартномаси май ойи ўрталарига қадар имзоланиши кутилмоқда. Ҳужжат ҳозирда якуний босқичда турибди.
"Президент томонидан июлдан қурилиш ишларини бошлаш бўйича аниқ топшириқ берилган", — деди у.
Лойиҳа доирасида йирик консорциум иштирок этмоқда. Асосий келишув хусусий инвестор билан имзоланиб, унда барча шартлар белгилаб олинади.
Маълум қилинишича, янги аэропорт очилгандан сўнг амалдаги Тошкент аэропорти ёпилиши мумкин. Ҳозирча унинг ўрнида қандай объект қурилиши аниқ эмас.
Чориевнинг таъкидлашича, Ўзбекистонда ҳаво қатновига бўлган талаб йиллик тахминан 30 фоизга ўсмоқда. Амалдаги аэропорт эса 2029 йилга бориб ўз имкониятларини тўлиқ ишлатиб бўлиши кутилмоқда.
Шу сабаб янги аэропорт камида икки баравар кўпроқ рейсларни қабул қилиш ва жўнатиш имкониятига эга бўлиши режалаштирилган.
