Давлат раҳбари Ўзбекистон овози кўчасида амалга оширилган ободонлаштириш ишлари, замонавий инфратузилма ва аҳоли ҳамда сайёҳлар учун яратилган шароитларни кўздан кечирди. Ушбу кўча 2025 йилда ишга туширилган бўлиб, бу ерда пиёдалар ва велосипед йўлаклари, дам олиш масканлари, спорт майдончалари ҳамда турли сервис объектлари ташкил этилган.
Лойиҳа доирасида 165 та савдо объекти йўлга қўйилиб, минглаб янги иш ўринлари яратилган. Айни пайтда тадбиркорларнинг бир қисми узлуксиз — 24/7 ишлаш тартибига ўтган.
Маълум қилинишича, 2025 йилда пойтахтда 26 та кўча туну кун фаолият юритишга ўтказилган. Бу орқали юзлаб янги савдо ва сервис нуқталари ташкил этилиб, аҳоли бандлиги таъминланган.
Жорий йилда эса яна 18 та янги туризм кўчасини ташкил этиш, юзлаб объектларни ишга тушириш ва минглаб янги иш ўринлари яратиш режалаштирилмоқда. Президент мазкур йўналишда хизматлар сифатини ошириш ва инвестицияларни кенг жалб этиш зарурлигини таъкидлади.
