Ҳужжат 5 май куни Олий Мажлис Қонунчилик палатаси депутатлари томонидан биринчи ўқишда қабул қилинди.
Лойиҳага кўра, Ўзбекистонда ишлаётган эркаклар фарзанд дунёга келганда қисқа муддатли, ҳақ тўланадиган таътил олиш ҳуқуқига эга бўлиши мумкин. Бу ташаббус оилада янги туғилган чақалоқ ва онага кўмак бериш, шунингдек, оилавий мажбуриятларни енгиллаштириш мақсадида илгари сурилмоқда.
Маълумотларга кўра, “Миллий тикланиш” партияси фракцияси муҳокамаларида таъкидланишича, янги тартиб ишлаётган оталарга фарзанд туғилганидан кейин 5 кунгача ҳақ тўланадиган таътил олиш имконини беради. Бу таътил бир ой ичида олиниши мумкин.
Депутат Нодир Тилаволдиевнинг айтишича, мазкур норма оилавий қўллаб-қувватлаш тизимини кучайтиришга хизмат қилади.
Қонун лойиҳасида фақат ижтимоий йўналиш эмас, балки меҳнат бозорини тартибга солишга қаратилган қатор ўзгаришлар ҳам назарда тутилган. Жумладан, норасмий бандликни камайтириш, иш ҳақини кечиктирган иш берувчилар учун жавобгарликни кучайтириш ҳам режалаштирилмоқда.
Шунингдек, ишга қабул қилиш жараёнларини рақамлаштиришга алоҳида эътибор қаратилмоқда. Янги тартибга кўра, кўплаб ҳужжатлар талаб этиш амалиёти қисқартирилиб, асосий маълумотлар шахсий идентификация рақами орқали текширилиши мумкин бўлади. Э-имзо ва биометрик идентификация ҳам юридик жиҳатдан тенг кучга эга ҳужжат сифатида қабул қилинади.
Қонун лойиҳасида меҳнат жараёнида тазйиқ ва зўравонликка қарши курашиш, ходимларни ҳимоя қилиш бўйича ҳам янги нормалар киритилган.
