“Open budget”ning targ‘ibot bosqichiga start berildi

Bugun, 19 avgustdan boshlab  “Ochiq byudjet” portalida “Tashabbusli byudjet” jarayonlarining 2025 yilgi 2-mavsumi doirasida saralash bosqichi yakunlandi hamda targ‘ibot bosqichiga start berildi. Bu haqda Iqtisodiyot va moliya vazirligi axborot xizmati ma’lum qildi.

Unga ko‘ra, 2-mavsum doirasida fuqarolar tomonidan 22 ming 623 ta taklif kelib tushgan hamda 18 ming 656 ta taklif saralash bosqichidan o‘tkazilgan. Saralashdan o‘tgan loyihalar uchun 3 kunlik targ‘ibot bosqichi o‘tkaziladi.

Bunda tashabbuskorlar saralashdan o‘tgan loyihalarni targ‘ib qilish orqali ovoz berish bosqichiga tayyorgarlik ko‘radi. Ma’lumot uchun,  loyiha kiritish bosqichi – 15 iyul -3 avgust, saralash bosqichi – 4-18 avgust, targ‘ibot bosqichi – 19-21 avgust, ovoz berish bosqichi – 22-31 avgust kunlari o‘tkazilishi rejalashtirilgan.  

Joriy yildagi 2-mavsum g‘oliblari 1 sentyabr – Mustaqillik bayrami kuni e’lon qilinadi.