Qashqadaryo viloyatining Koʻkdala tumanida lalazor hududida avtomobillarda harakatlangan shaxslar aniqlandi, ularga nisbatan tegishli choralar koʻrildi.
Maʼlum qilinishicha, ijtimoiy tarmoqlarda tarqalgan videoda transport vositalarining lalazor maydonida harakatlanganligi aks etgan. Oʻtkazilgan oʻrganishlar davomida huquqbuzarlar aniqlandi, ularning avtomobillari jarima maydonchasiga joylashtirilgan.
Mutasaddilar hisob-kitobiga koʻra, mazkur holat natijasida tabiatga 6 mln 592 ming soʻm zarar yetkazilgan. Shuningdek, uch nafar huquqbuzarning har biriga bazaviy hisoblash miqdorining 50 baravari — 20 mln 600 ming soʻmdan, jami 61 mln 800 ming soʻm jarima belgilangan.
