Xitoyning milliy aviatayinlovchisi — Air China ilk bor Pekin–Toshkent–Pekin yo‘nalishi bo‘yicha muntazam parvozlarni amalga oshirishni boshladi. Bu haqda Uzbekistan Airports matbuot xizmati xabar berdi.
2025 yil 19 iyul kuni soat 19:40 daToshkent xalqaro aeroportiga aviakompaniyaning birinchi reysi kelib qo‘ndi. Zamonaviy Boeing-737samolyotida yetib kelgan ekipaj va yo‘lovchilar an’anaviy suv arkasi va gullar bilan tantanali tarzda kutib olindi.
— “Biz Xitoy va O‘zbekiston poytaxtlari o‘rtasida to‘g‘ridan to‘g‘ri aviaqatnovlarni yo‘lga qo‘yishdan mamnunmiz. Bu yo‘nalish ikki mamlakat o‘rtasidagi savdo, sayyohlik va madaniy aloqalarni mustahkamlashda muhim rol o‘ynaydi. Air China nafaqat yo‘lovchilarni, balki shaharlar va imkoniyatlarni ham bog‘lovchi ko‘prik bo‘lishga intilmoqda”, — dedi aviakompaniya vakili.
“Uzbekistan Airports Handling” direktorining birinchi o‘rinbosari Umid Hamrayev esa quyidagicha izoh berdi:
— “Air China kabi yirik hamkorni qabul qilishdan mamnunmiz. Ushbu yo‘nalishga talab yuqori bo‘lishiga ishonchimiz komil. Yo‘lovchilar uchun barcha zarur shart-sharoitlar yaratilgan.”
Parvozlar haftaning seshanba, payshanba va shanba kunlari amalga oshiriladi.
Air China — Xitoyning eng yirik va asosiy aviakompaniyasi bo‘lib, Star Alliance xalqaro alyansi a’zosi hisoblanadi. Kompaniya 1988 yilda tashkil etilgan va Pekin aeroportida joylashgan.
