Ижтимоий тармоқларда патрул-пост хизмати ходимининг вояга етмаган қизларга нисбатан ноқонуний ҳаракатлари ҳақида видео мурожаат тарқалди. Унда жабрланувчи сифатида 14 ёшли қиз воқеа тафсилотларини баён қилган.
Қизнинг айтишича, ҳодиса 27 апрель куни кечқурун у дугонаси билан ҳовлида ўтирган пайтда содир бўлган. Уларнинг олдига Spark автомашинаси келиб тўхтаган ва ҳайдовчи қизларни машинага ўтиришга мажбурлаган. Қиз аввал рад этганини, аммо эркак ўзини милиция ходими сифатида таништириб, ишонч уйғотганини айтган. Шундан сўнг у қизларни узоқдаги тоғли ҳудудга олиб бориб, тегажоғлик қилгани таъкидланмоқда.
Маълум қилинишича, қизлардан бирининг акаси геолокация орқали уларнинг жойлашувини аниқлаб, воқеа жойига етиб келган. Кейинчалик гумонланувчи томонидан таҳдидли қўнғироқлар ҳам бўлгани айтилмоқда.
Мазкур ҳолат юзасидан ИИВ Шахсий хавфсизлик бўлинмаси прокуратура органлари билан ҳамкорликда текширув бошлаган. Хабар қилинишича, мурожаатда тилга олинган ходим хизмат вазифасидан четлатилган.
Вазирликка кўра, фактлар тасдиқланса, ходимнинг ҳаракатларига қатъий ҳуқуқий баҳо берилиб, жиноий жавобгарликка тортишгача бўлган чоралар кўрилади. Шунингдек, ички ишлар органлари тизимида бундай ҳолатлар мутлақо қабул қилинмаслиги таъкидланган.
