Самарқандда биринчи босқичда 100 та “Ютонг” электробус олиб келинди. Ҳар бири 30 ўринли, умумий сиғими 75 нафар йўловчига мўлжалланган. Бу автобуслар шаҳарнинг 9 та йўналишида ҳаракатланиб, кунига 70 минг йўловчига хизмат кўрсатмоқда.
Электробуслар учун 4 гектар майдонда автосарой ташкил этилди. Бир вақтнинг ўзида 50 та автобусни қувватлаш ва хизмат кўрсатиш имконияти яратилган. Ёпиқ тураргоҳда техник хизмат ва мобил таъмирлаш жиҳозлари ҳам мавжуд.
Лойиҳанинг иккинчи босқичида яна 250 та электробус хариди режалаштирилган. Европа тикланиш ва тараққиёт банкидан 120 миллион доллар маблағ жалб қилинади. Бу ёқилғи сарфини 32 минг литрга, зарарли газ чиқимини 27 тоннага камайтиради.
Президент Мирзиёев:“Мазкур соҳанинг иқтисодий барқарорлигини ошириш учун электробусларга хизмат кўрсатадиган, уларни таъмирлайдиган мутахассисларни тайёрлаш бўйича Самарқанд тажрибасини яратишимиз керак”, – деди.
Шунингдек, давлат раҳбари шаҳарнинг Гагарин ва Рудакий кўчалари кесишмасида барпо этилган туннелни ҳам кўздан кечирди. Узунлиги 600 метр, бир кунда ўртача 50 мингта транспорт воситаси ҳаракатланиши мумкин. Туннелда замонавий ёритиш тизими ва ер ости пиёдалар йўлаги барпо этилган. Қурилиш Хитой ва Туркия компаниялари ҳамкорлигида, ҳаракат тўхтатилмай олиб борилди.
Бугунги кунда автосаройда 265 нафар ходим фаолият юритмоқда. Янги электробусларнинг олиб келиниши эса 500 дан ортиқ янги иш ўринларини яратади.
Шаҳар жамоат транспорти модернизатсияси – экологик тоза ва қулай транспортни йўлга қўйишга қаратилган.
