Бугун, 18 март куни Ўзбекистон Марказий банки асосий ставкани 14 фоиз даражасида ўзгаришсиз қолдирди.
Маълум қилинишича, 2026 йил бошидан инфляцион жараёнларда муайян тезлашиш кузатилган. Хусусан, февраль ойида базавий инфляция йиллик ҳисобда 6,3 фоизни ташкил этган, умумий инфляция эса 7,3 фоиз даражасида сақланиб қолган.
Озиқ-овқат маҳсулотлари нархининг ўсиши инфляцион кутилмалар юқори бўлиб қолишига сабаб бўлмоқда. Шу билан бирга, иқтисодиётда юқори талаб сақланиб, савдо айланмаси, кўчмас мулк бозори ва бюджет харажатлари фаоллиги орқали ўсиш қўллаб-қувватланмоқда.
Марказий банк таъкидлашича, ишлаб чиқарувчилар нархларининг ўсиши келгусида истеъмол нархларига ҳам таъсир кўрсатиши мумкин. Шунингдек, глобал бозорлардаги геосиёсий кескинликлар, энергия ресурслари ва озиқ-овқат нархларининг эҳтимолий ошиши инфляцияга қўшимча босим юзага келтириши мумкин.
Шу билан бирга, экспорт тушумлари, пул ўтказмалари ва олтин нархининг юқори даражада сақланиши миллий валюта барқарорлигига ижобий таъсир кўрсатмоқда.
Маълумот учун, асосий ставкани кўриб чиқиш бўйича навбатдаги йиғилиш 2026 йил 29 апрель кунига белгиланган.
