Ўзбекистонда давлат грантлари асосида олий таълим олган битирувчилар учун амалдаги камида уч йил ишлаб бериш талаби ўзгартирилиши мумкин. Бу ҳақда “Кадрларни давлат грантлари асосида мақсадли тайёрлаш тартиби тўғрисида низомни тасдиқлаш ҳақида”ги қарорга ўзгартириш киритиш бўйича лойиҳада келтирилган.
Унга кўра, амалдаги низомда белгиланган “камида уч йил” ишлаб бериш мажбуриятига оид нормаларни чиқариб ташлаш ва уни “мажбурий” деган умумий тушунча билан алмаштириш таклиф қилинмоқда.
Шу билан бирга, давлат гранти асосида ўқиган битирувчиларнинг ишлаб бериш муддати таълим йўналишининг ўзига хос жиҳатларини ҳисобга олган ҳолда Олий таълим, фан ва инновациялар вазирлиги томонидан алоҳида белгилаб берилиши кўзда тутилган.
Ҳужжатда, шунингдек, битирувчиларни ишга тақсимлашга оид айрим тушунчаларга аниқлик киритиш таклиф этилган. Жумладан, “доимий яшаш жойи” атамасини “яшаш жойи” деб алмаштириш режалаштирилмоқда.
Эслатиб ўтиш жоиз, аввалроқ 2026–2027 ўқув йилидан бошлаб тиббиёт йўналишларида оширилган тўлов-контракт асосида қабул қилиш тартибини бекор қилиш масаласи ҳам муҳокамага қўйилган эди.
