Президент Шавкат Мирзиёев Ўзбекистондаги Ислом цивилизацияси марказининг расмий очилиш маросими ва ифторликда иштирок этди. Тадбирга ҳудудлардан студиялар орқали нуронийлар, олим-уламолар ва жамоатчилик вакиллари уланди. Шунингдек, турли миллат ва диний конфессиялар аъзолари, дипломатик корпус ҳамда халқаро ташкилотлар вакиллари ҳам иштирок этди.
Давлат раҳбари йиғилганларни муборак Рамазон ойи билан табриклаб, тинчлик ва соғлик неъматлари учун шукроналик билдирди. Ушбу ойда аҳолининг ижтимоий ҳимояга муҳтож қатламларига кўмак кўрсатиш ишлари кенг қулоч ёйгани, давлат ва нодавлат ташкилотлар, хайрия жамғармалари ҳамда тадбиркорлар томонидан хайрли ишлар амалга оширилаётгани қайд этилди.
Маросимда Ислом цивилизацияси марказининг очилиши мамлакат ҳаётидаги муҳим тарихий воқеа экани таъкидланди. Президент мазкур мажмуа юртимизнинг бой тарихи ва маданияти, илмий меросини намоён этувчи йирик маърифий маскан эканини билдирди.
Қайд этилишича, марказ ҳудуди қарийб 10 гектарни, биноларнинг умумий майдони эса 50 минг квадрат метрни ташкил этади. У ерда турли даврларга оид экспозициялар, жумладан, исломгача бўлган давр, Биринчи ва Иккинчи Ренессанс, Янги Ўзбекистон тараққиётига бағишланган заллар жой олган.
Шунингдек, марказда дунёдаги энг қадимий Қуръони карим нусхаларидан бири — Усмон мусҳафи сақланмоқда. Экспозицияни бойитиш мақсадида минглаб ноёб қўлёзмалар ва тарихий ашёлар жамланган.
Давлат раҳбари ушбу марказ келгусида ёшларни илм-маърифатга ундайдиган, миллий ғурурни мустаҳкамлайдиган муҳим маънавий макон бўлишини таъкидлади. Тадбир сўнггида Қуръон тиловати қилинди ва юрт тинчлиги, халқ фаровонлиги учун дуолар ўқилди.
