Россияда мигрантлар учун янги давлат божлари жорий этилди. Бу ҳақда ТАСС нашри хабар берди.
Маълум қилинишича, Росиияда 1 сентябрдан бошлаб қўшимча давлат божлари жорий қилинган бўлиб, буларга рўйхатдан ўтказиш, миграция ҳисоби ва меҳнат фаолиятига рухсат бериш билан боғлиқ тўловлар ҳам киради.
Булар орасида чет эл фуқаросига ёки фуқаролиги бўлмаган шахсга патент бериш ёхуд қайта расмийлаштириш учун 4200 рубль, ишлаш учун рухсатноманинг амал қилиш муддатини узайтириш учун 4200 рубль бож мавжуд.
Шунингдек, ишлаш учун рухсатнома дубликатини бериш, мигрант ёки фуқаролиги бўлмаган шахснинг ишлаш учун рухсатномасидаги маълумотларга ўзгартиришлар киритиш ёки патент дубликатини бериш учун 2100 рубль миқдорида бож белгиланган.
Чет эллик ходимларни жалб қилиш ва улардан фойдаланиш учун рухсатномалар дубликатларини бериш, шунингдек уларга ўзгартиришлар киритиш учун 2100 рубль, чет эл фуқаросининг Россия Федерациясида вақтинча бўлиш муддатини узайтириш учун 1000 рубль ва турган жойи бўйича ҳисобга қўйиш учун 500 рубль миқдорида давлат божи жорий этилган.
Таъкидланишича, ҳукумат давлат божларининг янгиланиши мигрантларнинг ўзларини ҳам ҳужжатларга ва уларнинг амал қилиш муддатларига янада масъулиятлироқ ёндашишга ундашини кутмоқда.
