Дубайда наркотик харид қилган африкалик эркак 10 йилга қамалди. Бу ҳақда Gulf News хабар берди.
Билдирилишича, африкалик фуқаро номаълум дилердан турли хил гиёҳванд моддаларни рақамли валютада харид қилган. Уни Дубай полицияси Ал-Хаванеэж ҳудудида тахминан 80 грамм марихуана ва бошқа тақиқланган моддалар билан қўлга олган.
Ҳуқуқ-тартибот идоралари дастлаб декабрь ойида эркак гиёҳванд моддаларни сақлаётгани ва истеъмол қилаётгани ҳақида ишончли маълумот олган. Прокурорлардан ордер олингач, полиция кузатув гуруҳи унинг изига тушиб, ҳибсга олган. Ходимлар уни қўлга олаётган пайтда эркак гиёҳванд модда таъсирида бўлгани, бироқ спиртли ичимлик ҳиди сезилмагани ҳақида гувоҳлик берган.
Дубай суди унга 100 минг дирҳам жарима ҳам белгилаган ва жазо муддати тугагач, мамлакатдан депортация қилиниши кутилмоқда.
Тинтув вақтида гумонланувчи ёнидан бир нечта пакетга жойланган гиёҳванд моддаларга ўхшаш моддалар топилиб, лабораторияга юборилган. Текширувлар натижасида уларнинг 80 граммга яқин марихуана экани аниқланган. Эркакнинг пешоб намунасида ҳам марихуананинг фаол моддаси — THC (тетрагидроканнабинол) мавжудлиги тасдиқланган.
