Россияда “Эластик” порох заводида портлаш юз берди, натижада 20 киши ҳалок бўлди. Бу ҳақда РБК маълум қилди.
Маълум қилинишича, портлаш 15 август куни эрталаб содир бўлган. Портлаш оқибатида бино тўлиқ вайрон бўлган.
Ёнғин кейинчалик тротил сақланадиган омборга ҳамда 152 миллиметр калибрли ўқ-дорилар ишлаб чиқарадиган иккинчи цехга ҳам ўтган. Умумий ҳисобда торт бино бутунлай вайрон бўлган.
Портлаш сабаби ҳозирча номаълум. Воқеа бўйича Россия Жиноят кодексининг 217-моддаси 3-қисми (хавфли ишлаб чиқариш объектларида саноат хавфсизлиги талабларини бузиш оқибатида одамлар ҳалок бўлишига сабаб бўлиш) бўйича жиноят иши қўзғатилган.
Ҳалок бўлганлардан ташқари, 154 киши жароҳат олган, улардан 31 нафар бемор Рязан ва Москва шифохоналарида даволанмоқда.
Қидирув-қутқарув ишлари давом этмоқда. Расмий маълумотга кўра, вайрон бўлган 3000 квадрат метр майдоннинг ярми тозаланган. Итлар ёрдамида барча биноларда тирик қолганларни излаш ишлари олиб борилган.
