Россиялик таниқли журналист Юрий Дудьга нисбатан “давлатга хиёнат” моддаси бўйича текширув бошланиши мумкин. Бу ҳақда ТАСС ахборот агентлиги ёзмоқда.
“Юрий Дудьнинг ҳаракатлари Жиноят кодексининг 275-моддаси – давлатга хиёнат – аломатларига эга бўлиши мумкин. Узоқ муддатли озодликдан маҳрум этиш жазоси кўзда тутилган”, – дейилади хабарда.
Агар журналистга нисбатан юқорида келтирилган моддага асос иш қўзғатилса у 20 йилгача қамоқ жазоси билан жазоланади.
Маълум қилинишича, бу баёнот Дуднинг АҚШнинг Россиядаги собиқ элчиси Майкл Маcфол билан олиб борган интервьюси эълон қилинганидан кўп ўтмай пайдо бўлган. Аммо Дуд мазкур ҳолатга ҳануз жавоб бергани йўқ.
Эслатиб ўтамиз, аввалроқ Россия ҳукумати Дудьни “хорижий агент” деб эълон қилган, сўнгра у мазкур мақом билан боғлиқ мажбуриятларни бажармаганликда айбланган эди. Журналистга нисбатан ҳибсга олиш буйруғи чиқарилган ва у халқаро қидирувга берилган.
Журналист Россиянинг Украинага бостириб кирганидан сўнг, 2022 йилда Испанияга кўчиб ўтган эди. Сўнгги йилларда у бир неча бор расмий босимларга учраган.
2023 йил ноябрь ойида Виктория ва Вадим Тсигановлар билан интервьюсидан сўнг, унга нисбатан “армияни обрўсизлантириш” бўйича текширув ўтказилган, 2022 йил ёзида эса “гей-пропаганда” моддаси бўйича жаримага тортилган.
