Rossiyalik taniqli jurnalist Yuriy Dudga nisbatan “davlatga xiyonat” moddasi bo‘yicha tekshiruv boshlanishi mumkin. Bu haqda TASS axborot agentligi yozmoqda.
“Yuriy Dudning harakatlari Jinoyat kodeksining 275-moddasi – davlatga xiyonat – alomatlariga ega bo‘lishi mumkin. Uzoq muddatli ozodlikdan mahrum etish jazosi ko‘zda tutilgan”, – deyiladi xabarda.
Agar jurnalistga nisbatan yuqorida keltirilgan moddaga asos ish qo‘zg‘atilsa u 20 yilgacha qamoq jazosi bilan jazolanadi.
Ma’lum qilinishicha, bu bayonot Dudning AQSHning Rossiyadagi sobiq elchisi Maykl Macfol bilan olib borgan intervyusi e’lon qilinganidan ko‘p o‘tmay paydo bo‘lgan. Ammo Dud mazkur holatga hanuz javob bergani yo‘q.
Eslatib o‘tamiz, avvalroq Rossiya hukumati Dudni “xorijiy agent” deb e’lon qilgan, so‘ngra u mazkur maqom bilan bog‘liq majburiyatlarni bajarmaganlikda ayblangan edi. Jurnalistga nisbatan hibsga olish buyrug‘i chiqarilgan va u xalqaro qidiruvga berilgan.
Jurnalist Rossiyaning Ukrainaga bostirib kirganidan so‘ng, 2022 yilda Ispaniyaga ko‘chib o‘tgan edi. So‘nggi yillarda u bir necha bor rasmiy bosimlarga uchragan.
2023 yil noyabr oyida Viktoriya va Vadim Tsiganovlar bilan intervyusidan so‘ng, unga nisbatan “armiyani obro‘sizlantirish” bo‘yicha tekshiruv o‘tkazilgan, 2022 yil yozida esa “gey-propaganda” moddasi bo‘yicha jarimaga tortilgan.
