Шимолий Корея Россияга Украинадаги уруш давомида 12 миллиондан ортиқ артиллерия снаряди етказган. Бу ҳақда Жанубий Корея ҳарбий разведкаси тайёрлаган ҳисоботга таяниб, Yonhap агентлиги хабар берди.
Сўнгги маълумотларга кўра, КХДР томонидан Россияга юборилган ҳарбий юк контейнерлари сони 28 мингдан ошган. Бу контейнерлар асосан 152 мм калибрдаги ўқ-дорилар билан тўлдирилган.
Украина ҳарбий разведкаси раҳбари Кирилл Будановнинг айтишича, бугунги кунда Россия армиясидаги йирик калибрли снарядларнинг ярми Шимолий Корея ишлаб чиқарган.
Уруш бошида “снаряд танқислиги”дан шикоят қилган Россия бу борада КХДР билан иттифоқни чуқурлаштиргани кузатилмоқда.
2024 йилда Москва ва Пхенян ўртасида ҳарбий ҳамкорликни назарда тутувчи стратегик шериклик шартномаси имзоланган.
Унга кўра, томонлар ҳарбий ёрдам беришга мажбур. Бундан ташқари, Пхенян яқин ойларда Россиянинг Украинадаги ҳужумларини қўллаб-қувватлаш учун 25 мингдан 30 минггача аскар юборишни режалаштирмоқда.
Россия расмийлари эса бу ҳарбий алоқаларни очиқ тасдиқламаган.
