Markaziy bank boshqaruvining 2026 yil 29 aprel kuni bo‘lib o‘tgan yig‘ilishi yakunlariga ko‘ra, asosiy stavka 14 foiz darajasida o‘zgarishsiz qoldirildi.
Ma’lum qilinishicha, 2026 yil mart oyida umumiy inflyatsiya yillik 7,1 foizgacha, bazaviy inflyatsiya esa 5,7 foizgacha pasaygan. Shu bilan birga, umumiy inflyatsiya yil oxiriga qadar 6,5 foiz atrofida shakllanishi kutilmoqda.
Iqtisodiyot tarmoqlarida yuqori o‘sish sur’atlari saqlanib qolmoqda. Jumladan, 2026 yil uchun iqtisodiy o‘sish prognozi 7–7,5 foizgacha oshirilgan.
Shu bilan birga, tashqi iqtisodiy muhitdagi geosiyosiy ziddiyatlar, neft va oziq-ovqat narxlarining oshishi, logistika xarajatlarining ko‘payishi inflyatsiyaga qo‘shimcha bosim ko‘rsatishi mumkinligi qayd etilgan.
Markaziy bank pul-kredit siyosati orqali inflyatsiyani 5 foizlik maqsadli darajaga tushirish, makroiqtisodiy barqarorlikni ta’minlash va aholi xarid qobiliyatini qo‘llab-quvvatlashni davom ettiradi.
Asosiy stavkani ko‘rib chiqish bo‘yicha navbatdagi yig‘ilish 2026 yil 17 iyun kuniga belgilangan.
