U mamlakatimizning ijtimoiy-iqtisodiy rivojlanishida, davlat boshqaruvi tizimini takomillashtirish va yangi avlod iqtisodchilarini tayyorlashda katta xizmat qilgan.
Vyacheslav Golishev 1951 yil 4 mayda Rossiya Federatsiyasining Omsk shahrida tug‘ilgan. 1972 yilda Toshkent xalq xo‘jaligi institutini tugatib, iqtisodchi mutaxassisligini olgan, 1980 yilda M.Lomonosov nomidagi Moskva davlat universitetida nomzodlik dissertatsiyasini himoya qilgan.
Mehnat faoliyatini matbaa sohasida boshlagan, keyinchalik Toshkent xalq xo‘jaligi instituti, Davlat reja qo‘mitasi va respublika partiya hamda davlat organlarida turli lavozimlarda ishlagan. 1992-1995 yillarda Prezident huzuridagi Jahon muammolari instituti direktori o‘rinbosari, Istiqbolni belgilash va statistika davlat qo‘mitasi raisining birinchi o‘rinbosari sifatida faoliyat yuritgan.
2005-2006 yillarda O‘zbekiston Respublikasi Bosh vazirining o‘rinbosari, iqtisod vaziri, iqtisod va tashqi iqtisodiy aloqalar kompleksi rahbari lavozimlarida mamlakatimiz ijtimoiy-iqtisodiy siyosatiga rahbarlik qilgan. Shu bilan birga Prezidentning davlat maslahatchisi sifatida ko‘p yillar ishlagan, davlat dasturlari va konseptual hujjatlarni ishlab chiqishda faol qatnashgan.
Bir necha marta O‘zbekiston Respublikasi Oliy Majlisi deputati bo‘lgan, qonunchilik va parlamentarizm rivojiga hissa qo‘shgan. Shuningdek, yangi avlod iqtisodchi kadrlarini tayyorlashga katta e‘tibor bergan.
Vyacheslav Golishev "O‘zbekiston Respublikasida xizmat ko‘rsatgan iqtisodchi" faxriy unvoni va "Do‘stlik" ordeni bilan mukofotlangan. Mamlakatimizning fidoyi xodimi, olim va yoshlar uchun mehribon ustoz sifatidagi xotirasi qalblarda abadiy saqlanadi.
