У мамлакатимизнинг ижтимоий-иқтисодий ривожланишида, давлат бошқаруви тизимини такомиллаштириш ва янги авлод иқтисодчиларини тайёрлашда катта хизмат қилган.
Вячеслав Голишев 1951 йил 4 майда Россия Федерациясининг Омск шаҳрида туғилган. 1972 йилда Тошкент халқ хўжалиги институтини тугатиб, иқтисодчи мутахассислигини олган, 1980 йилда М.Ломоносов номидаги Москва давлат университетида номзодлик диссертациясини ҳимоя қилган.
Меҳнат фаолиятини матбаа соҳасида бошлаган, кейинчалик Тошкент халқ хўжалиги институти, Давлат режа қўмитаси ва республика партия ҳамда давлат органларида турли лавозимларда ишлаган. 1992-1995 йилларда Президент ҳузуридаги Жаҳон муаммолари институти директори ўринбосари, Истиқболни белгилаш ва статистика давлат қўмитаси раисининг биринчи ўринбосари сифатида фаолият юритган.
2005-2006 йилларда Ўзбекистон Республикаси Бош вазирининг ўринбосари, иқтисодиёт вазири, иқтисодиёт ва ташқи иқтисодий алоқалар комплекси раҳбари лавозимларида мамлакатимиз ижтимоий-иқтисодий сиёсатига раҳбарлик қилган. Шу билан бирга Президентнинг давлат маслаҳатчиси сифатида кўп йиллар ишлаган, давлат дастурлари ва концептуал ҳужжатларни ишлаб чиқишда фаол қатнашган.
Бир неча марта Ўзбекистон Республикаси Олий Мажлиси депутати бўлган, қонунчилик ва парламентаризм ривожига ҳисса қўшган. Шунингдек, янги авлод иқтисодчи кадрларини тайёрлашга катта эътибор берган.
Вячеслав Голишев “Ўзбекистон Республикасида хизмат кўрсатган иқтисодчи” фахрий унвони ва “Дўстлик” ордени билан мукофотланган. Мамлакатимизнинг фидойи ходими, олим ва ёшлар учун меҳрибон устози сифатидаги хотираси қалбларда абадий сақланади.
