Shavkat Mirziyoyev 19 fevral kuni Vashington shahrida bo‘lib o‘tgan “Tinchlik kengashi”ning dastlabki yig‘ilishida ishtirok etdi. Tadbir Donald Tramp raisligida o‘tkazildi va unda Ozarbayjon, Qozog‘iston, Bahrayn, Indoneziya, Argentina, Qatar, Pokiston, Vengriya, BAA, Turkiya, Sauudiya Arabistoni, Isroil va boshqa davlatlar delegatsiyalari rahbarlari qatnashdi.
Yig‘ilishda G‘azo sektorini qayta tiklash, gumanitar yordam ko‘rsatish hamda mintaqada tinchlik va barqarorlikni ta’minlash masalalari muhokama qilindi. O‘zbekiston rahbari sammit chaqirilgani uchun AQSh prezidentiga minnatdorlik bildirib, mamlakat “Tinchlik kengashi” tashabbusini qo‘llab-quvvatlashi va uni amalga oshirishda faol ishtirok etishini ta’kidladi.
Davlat rahbari so‘zlariga ko‘ra, mazkur kengash G‘azoni iqtisodiy va ijtimoiy jihatdan tiklash uchun muhim imkoniyat yaratadi. Shuningdek, O‘zbekiston usbu hududda uy-joylar, bog‘chalar, maktablar va shifoxonalar qurishga hissa qo‘shishga tayyor ekani qayd etildi.
Yig‘ilish yakunida “Tinchlik kengashi” faoliyatini qo‘llab-quvvatlash to‘g‘risidagi deklaratsiya imzolandi.
