Jahon banki ijrochi direktorlar kengashi O‘zbekiston uchun 250 million AQSh dollari miqdoridagi moliyalashtirish paketini tasdiqladi. Ushbu mablag‘lar "Shaharlarda yashash va unumdorlikni oshirish uchun qulay sharoyitlar yaratish" (Livable and Productive Cities Program — LPCP) dasturi doirasida yo‘naltiriladi.
Qayd etilishicha, moliyalashtirish mamlakatning 16 ta tuman va shahrida aholi hamda biznes uchun munitsipal infratuzilma va xizmatlarni rivojlantirishga xizmat qiladi. Hozirda O‘zbekistondagi 37 million aholining yarmidan ko‘pi shaharlarda yashaydi, 2050-yilga borib bu ko‘rsatkich 60 foizdan oshishi kutilmogda. Urbanizatsiya jarayonining jadallashuvi shaharlarni rejalashtirish va boshqarish, infratuzilma hamda kommunal xizmatlarni takomillashtirish zaruratini yuzaga keltirmogda.
Ma’lum qilinishicha, shaharlarning nazoratsiz o‘sishi, eskirgan infratuzilma, suv ta’minoti va kanalizatsiya xizmatlaridan foydalanish imkoniyatlarining cheklanganligi aholi turmush sifat va biznes unumdorligiga salbiy ta’sir ko‘rsatmogda. Ushbu muammolar tabiiy-iqlimiy favqulodda holatlar ta’sirida yanada kuchaymogda.
Mazkur masalalarga yechim topish maqsadida hukumat 2025 yilda hududlarni jadal kompleks rivojlantirish davlat dasturini ishga tushirgan. Dastur jami 3,6 million aholi yashaydigan 16 ta strategik muhim tuman va shaharni qamrab oladi.
Jahon banki tomonidan moliyalashtiriladigan LPCP dasturi ushbu davlat dasturida nazarda tutilgan tadbirlarni amalga oshirishni qo‘llab-quvvatlaydi. Dastur doirasida Yangiyo‘l va Marg‘ilon shaharlari, shuningdek, Qo‘ng‘irot, Chimboy, Asaka, G‘ijduvon, G‘allaorol, Yakkabog‘, Xatirchi, Chortoq, Bulung‘ur, Sirdaryo, Denov, Quva, Shovot va Hazorasp tumanlarida infratuzilmani rivojlantirish rejalashtirilgan.
LPCP dasturi Iqtisodiyot va moliya vazirligi tomonidan mahalliy hokimiyat organlari bilan hamkorlikda amalga oshiriladi. Dastur aholi va biznesning munitsipal infratuzilma va xizmatlardan foydalanish imkoniyatlarini kengaytirish, hududlarni rivojlantirish bo‘yicha bosh reja va investitsiya rejalarini ishlab chiqish, shuningdek, mahalliy hokimiyatlar salohiyatini oshirishni ko‘zda tutadi. Dastur doirasida yerlarning olib qo‘yilishi yoki fuqarolarning majburiy ko‘chirilishiga olib keladigan loyihalar moliyalashtirilmaydi.
2030 yilga kelib, LPCP dasturi orqali 16 ta tuman va shaharda qariyb 1 million aholining turmush sharotlarini to‘g‘ridan-to‘g‘ri yaxshilash rejalashtirilgan. Dastur 300 ming kishining transport xizmatlaridan foydalanish imkoniyatini oshirish, 400 ming aholi uchun jamoat joylari va bog‘larni rivojlantirishni nazarda tutadi. Shuningdek, infratuzilma loyihalarini amalga oshirish jarayonida qurilish sohasida 10 mingga yaqin vaqtincha ish o‘rinlari yaratilishi kutilmogda.
