Amerika Qoʻshma Shtatlari boʻylab federal migratsiya organlari tomonidan soʻnggi kunlarda kuchaytirilgan reydlar oʻtkazilayotgani munosabati bilan, AQShda yashayotgan va avtomobil boshqarayotgan Oʻzbekiston fuqarolari hujjatlarini toʻliq tartibga keltirish hamda doimo oʻzlari bilan olib yurish lozimligi haqida ogohlantirildi.
Maʼlumotlarga koʻra, federal yoʻllar va boshqa hududlarda oʻtkazilayotgan tekshiruvlar chogʻida quyidagi masalalarga alohida eʼtibor qaratilmogʻda:
- haydovchilik guvohnomalarining haqiqiyligi;
- hujjatlarning amal qilish muddati va qonuniyligi;
- ishlash huquqi va migratsion maqom;
- haydovchilarning ingliz tilini bilish darajasi.
AQSh hukimati noqonuniy migratsiyaga qarshi kurashni kuchaytirgani sababli federal organlar keng vakolatlar asosida faol reydlar olib bormogʻda. Xabarlarga koʻra, ushlangan ayrim shaxslar bir nechta haydovchilik guvohnomasidan foydalanish yoki terrorizmga oid gumonlar bilan tilga olinmogʻda.
Shu munosabat bilan, AQShda avtomobil boshqarayotgan vatandoshlardan quyidagilarga qatʼiy rioya qilish soʻralmogʻda:
- barcha shaxsiy hujjatlarni, jumladan haydovchilik guvohnomasi, migratsion maqom va ishlash huquqini tasdiqlovchi hujjatlarni tartibga keltirish;
- qonuniy maqomni tasdiqlovchi hujjatlarni doimo oʻzingiz bilan olib yurish.
Shuningdek, shubhali, tushunarsiz yoki muammoli holatlar yuzaga kelgan taqdirda, darhol Oʻzbekistonning AQShdagi diplomatik vakolatxonalari va konsullik muassasalariga murojaat qilish tavsiya etilmogʻda.
