19 noyabr kuni 84 yoshida vafot etgan Mirabbos Abdulhaqovich Mirzaahmedov milliy madaniyat va o‘zbek telesan’atining eng taniqli va mehnatkash namoyandalaridan biri edi. U 1941 yilda Toshkentda ziyolilar oilasida tug‘ilgan va teatr hamda kino yo‘nalishida professional ta’lim olgan.
Mehnat faoliyatini O‘zbekiston telekompaniyasida rejissyor yordamchisi sifatida boshlagan Mirzaahmedov 60 yildan ziyod vaqt mobaynida "Yoshlar" tahririyatida rejissyor va bosh rejissyor, "O‘zbekiston" telekanali oliy toifali rejissyori, shuningdek, 40 yildan ortiq efirga uzatilib kelayotgan "Otalar so‘zi – aqlning ko‘zi" ko‘rsatuvining rejissyori va boshlovchisi sifatida faoliyat yuritdi.
U tomonidan suratga olingan "Bahor qaytmaydi", "Izlayman", "Qalbingga quloq sol", "Bahs", "Uch ildiz", "Dunyoning ishlari" kabi telefilmlar milliy madaniyat xazinasidan munosib o‘rin olgan.
Prezident ta’ziyasida Mirabbos Mirzaahmedovning xalqchil ijodi, ma’naviy-axloqiy g‘oyalarni targ‘ib qilishdagi xizmatlari va yoshlarga ustozlik faoliyati alohida e’tirof etilgan.
Mirabbos Mirzaahmedov "O‘zbekiston Respublikasida xizmat ko‘rsatgan madaniyat xodimi" faxriy unvoni, "Mehnat shuhrati" va "Do‘stlik" ordenlari bilan mukofotlangan.
"Taniqli san’atkor, samimiy va kamtarin inson, yoshlarning mehribon ustoz Mirabbos Mirzaahmedovning xotirasi qalblarimizda hamisha yashaydi", — deyiladi Prezidentning ta’ziyasida.
