"O‘zbekiston pochtasi" AJ tomondan investitsiyalarni jalb etish masalasi ko‘rib chiqilmoqda. Bu haqda aksionerlik jamiyat matbuot xizmati xabar berdi.
Ma’lum qilinishicha, bu orqali infratuzilmani modernizatsiya qilish, logistikanini rivojlantirish, raqamli echimlarni joriy etish, pochta tarmog‘ini kengaytirish, shu jumladan qishloq va olis hududlarda pochta jo‘natmalari va posilkalarni qayta ishlash hamda yetkazib berish bo‘yicha zamonaviy quvvatlarni yaratish maqsad qilingan.
Kompaniya transformatsiyasini amalga oshirish va investitsiyalarni jalb etish uning faoliyatini uzoq muddat barqarorligini ta’minlash, yetkazib berish bo‘yicha xususiy operatorlar rivojlanayotgan sharoitda raqobatbardoshligini oshirish, zamonaviy xizmat ko‘rsatishning sifat standartlarini joriy etish, shuningdek respublika aholisi uchun, jumladan uzoq va olis hududlarda universal pochta xizmatlarining mavjudligini ta’minlash imkoniyatini beradi.
Ushbu tadbirlar yangi ish o‘rinlari yaratilishiga, elektron tijorat va butun mamlakat hududida bu bilan bog‘liq xizmatlarning rivojlanishiga xizmat qiladi.
Bugungi kunda, "O‘zbekiston pochtasi" AJning aksiyadorlari sifatida davlat tashkilotlari – Iqtisodiyot va moliya vazirligi hamda Davlat aktivlarini boshqarish agentligi, shuningdek, davlat ishtirokidagi beshta korxonalar va 16 mingdan ortiq yuridik va jismoniy shaxslar ishtirok etmoqda.
Jamiyat faoliyatiga yirik investorni jalb etish bilan bog‘liq o‘zgarishlar yuz berganda "Aksiyadorlik jamiyatlari va aksiyadorlar huquqlarini himoya qilish to‘g‘risida"gi qonun talablariga muvofiq tegishli ma’lumot rasmiy tarzda oshkor qilinadi.
Avvalroq UzPost pochta operatoridagi davlat ulushi xususiylashtirilgani haqida xabarlar tarqalgan.
