Yaqinda jurnalistlardan iborat guruh Farg‘ona viloyati Toshloq tumanidagi yangi “IT-shaharcha” bilan tanishish maqsadida press-turda ishtirok etdi. Tashrif davomida markazda xorijiy tillarni o‘rganish darajasi, startap garajlar va ixtirolar bilan tanishildi.
Farg‘ona viloyati boshqarmasi bosh mutaxassisi Sultonboq Boqijonovning ma’lumotiga ko‘ra, ayni paytda markazda 600 nafardan ortiq o‘quvchi ta’lim olmoqda. Ular dasturlash, xorijiy tillar, robototexnika va 3D modellashirish yo‘nalishlarida bilimga ega bo‘lishmoqda.
Mutaxassisning aytishicha, loyiha uchun ajratilayotgan mablag‘lar o‘zini oqlamoqda. Boqijonovga ko‘ra, bu markazlarda yetishayotgan kadrlar nafaqat mahalliy, balki xalqaro IT-bozorda ham o‘z o‘rniini topishi mumkin.
Ta’lim to‘liq bepul. O‘qituvchilarga esa yuqori maosh va barqaror ish sharoiti yaratilgan. Ularning faoliyati doimiy qo‘llab-quvvatlanmoqda.
Markazda inklyuzivlik tamoyiliga amal qilinib, nogironligi bo‘lgan yoshlar uchun moslashtirilgan infratuzilma tashkil etilgan. Xususan, binoga kirish joylarida maxsus yo‘lakchalar mavjud, har bir xonaga to‘siqsiz kirish mumkin.
“IT-shaharcha” hududida 24 soat faoliyat yuritadigan coworking zonalar mavjud. Bu yerda yoshlar bepul internet, Wi-Fi va boshqa zaruriy sharoitlar bilan ta’minlangan.
Loyiha yoshlar uchun faqatgina bilim olish maskani emas, balki kasbiy rivojlanish, IT-startaplar va frilanserlik faoliyatining yangi manziliga aylanmoqda. Farg‘onadagi markaz esa bu borada namuna sifatida keltirilmoqda.
