Яқинда журналистлардан иборат гуруҳ Фарғона вилояти Тошлоқ туманидаги янги “IТ-шаҳарча” билан танишиш мақсадида пресс-турда иштирок этди. Ташриф давомида марказда хорижий тилларни ўрганиш даражаси, стартап гаражлар ва ихтиролар билан танишилди.
Фарғона вилояти бошқармаси бош мутахассиси Султонбек Боқижоновнинг маълумотига кўра, айни пайтда марказда 600 нафардан ортиқ ўқувчи таълим олмоқда. Улар дастурлаш, хорижий тиллар, робототехника ва 3D моделлаштириш йўналишларида билимга эга бўлишмоқда.
Мутахассиснинг айтишича, лойиҳа учун ажратилаётган маблағлар ўзини оқламоқда. Боқижоновга кўра, бу марказларда етишаётган кадрлар нафақат маҳаллий, балки халқаро IТ-бозорда ҳам ўз ўрнини топиши мумкин.
Таълим тўлиқ бепул. Ўқитувчиларга эса юқори маош ва барқарор иш шароити яратилган. Уларнинг фаолияти доимий қўллаб-қувватланмоқда.
Марказда инклюзивлик тамойилига амал қилиниб, ногиронлиги бўлган ёшлар учун мослаштирилган инфратузилма ташкил этилган. Хусусан, бинога кириш жойларида махсус йўлакчалар мавжуд, ҳар бир хонага тўсиқсиз кириш мумкин.
“IТ-шаҳарча” ҳудудида 24 соат фаолият юритадиган coworking зоналар мавжуд. Бу ерда ёшлар бепул интернет, Wi-Фи ва бошқа зарурий шароитлар билан таъминланган.
Лойиҳа ёшлар учун фақатгина билим олиш маскани эмас, балки касбий ривожланиш, IТ-стартаплар ва фрилансерлик фаолиятининг янги манзилига айланмоқда. Фарғонадаги марказ эса бу борада намуна сифатида келтирилмоқда.
