Qozog‘iston Prezidenti Qosim-Jo‘mart Tokaev Ostona shahrida Osiyada o‘zaro hamkorlik va ishonch choralari bo‘yicha kengash (SVMDA)ning bosh ofisi ochilish marosimida qatnashdi. U qonun ustuvorligini ta’minlash zarurligini ta’kidladi.
Tantanali marosim chog‘ida Prezident Tokaev yodgorlik lavhasini ochdi va tashkilot bayrog‘i ko‘tarildi. U diplomatlarni kasb bayrami bilan tabriklab, Qozog‘iston bundan 30 yil avval SVMDA tashabbuschisi bo‘lganini eslatdi.
Tokaevning asosiy bayonotlaridan biri shunday bo‘ldi: “Bugungi kunda kuch ko‘pincha qonun tamoyillaridan ustun qo‘yilmoqda. Bunday sharoitda barcha davlatlar BMT Nizomi va xalqaro huquq normalariga qat’iy amal qilishi zarur”.
Shuningdek, u mamlakatda “Qonun va tartib” tamoyili mustahkam bo‘lishi kerakligini urg‘uladi.
Prezident raqamli transformatsiya haqida to‘xtalib: “Biz Qozog‘istonni sun’iy intellekt asosida rivojlanadigan raqamli davlatga aylantirmoqchimiz”, — deydi.
Uning ta’kidlashicha, hozirgi global xavflar fonida ochiq muloqot va ishonch muhitini saqlab qolish mintaqaviy barqarorlik garovidir.
