Маълум қилинишича, бемор бир неча ой аввал Шарқий Европага саёҳат қилган бўлиб, вирусни ўша ерда юқтириб олган бўлиши мумкин. Унда касаллик аломатлари пайдо бўлгач, тиббий ёрдамга мурожаат қилинган.
Дастлаб антитаначалар бўйича ўтказилган таҳлил ҳантавирус белгилари борлигини кўрсатган. Кейинчалик PZR-тести орқали ташхис расман тасдиқланган.
Шифокорлар беморнинг аҳволини барқарор деб баҳоламоқда. У интенсив терапия ёки қатъий изоляцияга муҳтож эмас. Беморнинг шахси ва у даволанаётган шифохона номи очиқланмаган.
Қайд этилишича, аниқланган вирус штамми Атлантика океанидаги MV Hondius круиз кемасида тарқалган штаммдан фарқ қилади. Жаҳон соғлиқни сақлаш ташкилоти маълумотларига кўра, мазкур кема бортида ҳантавирус туфайли Нидерландиялик эр-хотин ва Германия фуқароси вафот этган, яна камида саккиз киши касалланган.
Бортида 150 га яқин одам бўлган MV Hondius кемаси Испанияга йўл олган ва 10 май куни Тенерифе оролига етиб бориши керак. Ҳозирча кемада вирус аломатлари кузатилган йўловчилар йўқлиги айтилмоқда.
Reuters агентлиги хабарига кўра, бир қатор давлатлар касаллик тарқалишининг олдини олиш мақсадида кема Кабо-Верде қирғоқларига етиб келишидан аввал уни тарк этган йўловчиларни кузатмоқда. Вирус тарқалиши ҳақидаги хабарлар пайдо бўлишидан олдин 40 га яқин одам Санта-Элена портида кемадан тушган. Уларнинг аксариятининг қаердалиги ҳозирча номаълумлигича қолмоқда.
Ҳантавирус — одамга асосан кемирувчилар орқали юқадиган вируслар гуруҳи ҳисобланади. Вирус ҳайвонларнинг ажралмалари орқали юқиши мумкин бўлиб, ўпка ва буйрак фаолиятига жиддий зарар етказиши эҳтимоли бор.
Касаллик одатда иситма, бош ва мушак оғриқлари, кўнгил айниши ҳамда чарчоқ каби аломатлар билан кечади. Мутахассислар ҳантавирус гумони бўлганда дастлабки симптомлардан 72 соат ўтгач, такрорий таҳлил топширишни тавсия қилмоқда. Ҳозирча вирусга қарши махсус даво воситаси мавжуд эмас, беморларга асосан қўллаб-қувватловчи терапия қўлланади.
