Жорий йилнинг 2 май куни Ҳиндистоннинг Madhya Pradesh штатида содир бўлган даҳшатли воқеа кенг жамоатчилик эътиборини тортди. Икки ёшли бола отаси томонидан ёввойи ҳайвонларга тўла ўрмонга ташлаб кетилганига қарамай, қарийб 20 соат давомида тирик қолган.
Маълум қилинишича, воқеа боланинг онаси ўлдирилганидан кейин бошланган. Шундан сўнг эркак ўз фарзандини мотоциклга миндириб, аҳоли яшамайдиган ўрмон ҳудудига олиб борган ва у ерда ташлаб кетган.
Шундан кейин кичик ёшли бола мутлақо ёлғиз ҳолда ўрмон ичида қолган. У оёқяланг, деярли ҳимоясиз ҳолда, ёввойи ҳайвонлар яшайдиган хавфли ҳудудда инстинктив равишда ҳаракатланиб, узоқ вақт юришда давом этган.
Дастлабки тергов жараёнида эркак ҳуқуқ-тартибот идораларини чалғитишга уринган ва боланинг қаердалиги ҳақида аниқ маълумот бермаган. Шу сабаб қидирув ишлари кеч бошланган. Кейинчалик полиция, қутқарувчилар ва маҳаллий аҳоли иштирокида кенг кўламли қидирув операцияси йўлга қўйилган. Ўрмон ҳудуди, далалар, сув манбалари ҳамда хавфли жойлар босқичма-босқич текширилган.
Қарийб 20 соатдан сўнг, эрталаб қутқарувчилар ўрмон ичидан жуда суст овозни эшитиб қолган. Ана шу овоз орқали улар болани топишга муваффақ бўлган. Бола қаттиқ ҳолдан тойган, чанқаган ва оч қолган бўлса-да, тирик экани аниқланган.
Мутахассислар мазкур ҳолатни ҳақиқий мўъжиза сифатида баҳоламоқда. Чунки бу ёшдаги боланинг ўрмон шароитида, очлик ва хавф остида деярли бир сутка яшаб қолиши жуда кам учрайдиган ҳолат ҳисобланади.
Айни пайтда ҳуқуқни муҳофаза қилувчи органлари томонидан тергов ҳаракатлари давом этмоқда. Боланинг отасига нисбатан оғир жиноят моддалари бўйича айблов қўйилиши кутилмоқда.
