Президент “Соғлиқни сақлаш тизимида бошқарув самарадорлигини ошириш чора-тадбирлари тўғрисида”ги фармонига мувофиқ, соҳада бошқарув тизими қайта кўриб чиқилиб, ходимлар меҳнатига ҳақ тўлашнинг янги тартиби жорий этилди.
Ҳужжатга кўра, Ўзбекистон Республикаси Соғлиқни сақлаш вазирлиги ва унинг тизимидаги бошқарув ходимларининг иш ҳақи янги тизим асосида белгиланади.
Шунингдек, вазирлик ва унинг ҳудудий бўлинмалари ҳамда идоравий ташкилотларида Давлат бюджети ҳисобидан молиялаштириладиган бошқарув ходимлари штат бирликлари қуйидагича тасдиқланди:
Соғлиқни сақлаш вазирлиги марказий аппарати
— 298 та (жумладан, 1 та вазирнинг биринчи ўринбосари ва 5 та вазир ўринбосари);
Санитария-эпидемиологик осойишталик ва жамоат саломатлиги қўмитаси — 68 та;
Тиббиёт ва фармацевтика тармоғини ривожлантириш агентлиги — 42 та;
Клиник аудит инспекцияси ва унинг ҳудудий бўлинмалари — 128 та;
Аҳоли саломатлигини таҳлил қилиш илмий-тадқиқот маркази — 30 та;
Қорақалпоғистон Республикаси Соғлиқни сақлаш вазирлиги, вилоятлар ва Тошкент шаҳри соғлиқни сақлаш бошқармалари — жами 602 та; туман (шаҳар) соғлиқни сақлаш бўлимлари — 18 тадан.
Қайд этилишича, соҳа учун қўшимча ажратиладиган штат бирликлари Санитария-эпидемиологик осойишталик ва жамоат саломатлиги қўмитаси тизимидаги ташкилотлардаги 880 та штат бирлигини мақбуллаштириш ҳисобидан шакллантирилади.
Фармонга мувофиқ, Соғлиқни сақлаш вазирлиги тизимидаги бошқарув ходимларига Ижтимоий ҳимоя миллий агентлиги ходимлари учун белгиланган меҳнатга ҳақ тўлаш шартлари татбиқ этилади.
Жумладан:
— вазирлик марказий аппарати ходимларига Ижтимоий ҳимоя миллий агентлигининг марказий аппарати ходимлари учун белгиланган шартлар;
— Қорақалпоғистон Республикаси, вилоятлар ва Тошкент шаҳри соғлиқни сақлаш бошқармалари ходимларига ҳудудий бошқармалар даражасидаги шартлар;
— туман (шаҳар) бўлимлари ходимларига “Инсон” ижтимоий хизматлар марказлари даражасидаги шартлар;
— Клиник аудит инспекцияси ходимларига Ижтимоий инспекция тизимига тенглаштирилган шартлар;
— Аҳоли саломатлигини таҳлил қилиш илмий-тадқиқот маркази ходимларига Ижтимоий ҳимояни ривожлантириш институти учун белгиланган иш ҳақи разрядлари қўлланади.
Мазкур ўзгаришлар соғлиқни сақлаш тизимида бошқарув самарадорлигини ошириш, шунингдек, ходимларнинг моддий рағбатлантирилишини кучайтиришга қаратилган.
