Давлат хавфсизлик хизмати, Тошкент шаҳар ИИББ ҳамда Киберхавфсизлик маркази мутахассислари ҳамкорлигида ўтказилган тезкор тадбирда зарарли дастурлар савдоси билан шуғулланган шахс фаолиятига чек қўйилди.
Маълум қилинишича, Тошкент вилояти Чирчиқ шаҳрида яшовчи 2005 йилда туғилган фуқаро ўзи яратган зарарли APK дастурларни Telegram орқали 100–300 минг сўм эвазига 10 га яқин фойдаланувчига сотган.
Шунингдек, у мижозларга техник кўмак кўрсатиб, дастурлардан фойдаланиш бўйича маслаҳатлар бериб келган. Таъкидланишича, мазкур дастурлар орқали бошқа шахсларнинг Telegram аккаунтларига рухсатсиз кириш, СМС хабарларни ўқиш ҳамда тўлов тизимларидаги маблағларни ўзлаштириш имкони бўлган.
Аниқланишича, гумонланувчи мессенжердаги 5 дан ортиқ гуруҳ ва каналларга администраторлик қилиб, у ерда доимий равишда зарарли дастурларни тарғиб қилган.
Тадбир давомида ундан “Asus ExpertBook” ноутбуки, “Redmi Note 10 Pro” телефони, қаттиқ диск ва банк карталари ашёвий далил сифатида олинган.
Ҳозирда ушбу ҳолат юзасидан жиноят иши қўзғатилиб, тергов ҳаракатлари олиб борилмоқда. Фуқароларга шубҳали ҳолатлар юзасидан тегишли идораларга мурожаат қилиш тавсия этилган.
