Учрашувда Ўзбекистон ва Қозоғистон ўртасидаги савдо, транспорт, энергетика ва юқори технологиялар йўналишидаги ҳамкорликни кучайтириш, шунингдек, яқин йилларда ўзаро савдони 10 миллиард долларга етказиш чораларига алоҳида эътибор қаратилди.
Томонлар ҳудудлараро алоқалар фаоллашгани, ўтган йили товар айирбошлаш ҳажми 5 миллиард долларга етганини қайд этди. Автомобилсозлик, логистика, қурилиш материаллари, электротехника, кимё ва геология соҳаларида янги лойиҳалар кўриб чиқилди. Транспорт йўлакларини ривожлантириш, чегара инфратузилмасини модернизация қилиш ҳамда “яшил” энергия ташаббусларини илгари суриш масалалари ҳам кун тартибидан ўрин олди.
Шунингдек, етакчилар Қамбарота гидроэлектр станцияси қурилиши каби йирик минтақавий лойиҳаларни жадаллаштириш, сув ресурсларидан оқилона фойдаланиш, инновациялар, космик технологиялар, рақамлаштириш ва туризм йўналишларида ҳамкорликни кенгайтиришга келишиб олди. Музокаралар якунида ҳукуматларга эришилган келишувлар ижроси бўйича “йўл харитаси” ишлаб чиқиш топширилди.
