Шавкат Мирзиёев 31 март куни мамлакатимизга расмий ташриф билан келган Ермек Кошербаевни қабул қилди. Суҳбат аввалида меҳмон давлат раҳбарига Қосим-Жомарт Тоқаевнинг самимий саломи ва эзгу тилакларини етказди.
Мулоқотда Ўзбекистон ва Қозоғистон ўртасидаги яқин дўстлик, стратегик шериклик ва иттифоқчилик муносабатларини мустаҳкамлаш масалалари муҳокама қилинди. Парламентлар, ҳукуматлар ва ишбилармон доиралар даражасидаги фаол ҳамкорлик мамнуният билан қайд этилди.
Томонлар қўшма Ҳукуматлараро комиссия самарали ишлаётганини таъкидлаб, товар айирбошлаш ҳажми ўсиб бораётганини қайд этди. Саноат, энергетика, транспорт, экология ва сувдан фойдаланиш соҳаларидаги кооперацияни кенгайтириш, нодир металлар бўйича ҳамкорликни йўлга қўйиш, сайёҳлик ва гуманитар алмашинув дастурларини ривожлантиришга алоҳида эътибор қаратилди.
Шунингдек, бўлажак икки ва кўп томонлама тадбирлар кун тартибини тайёрлаш ҳамда халқаро ва минтақавий сиёсат масалалари юзасидан фикр алмашилди.
