Uchrashuvda O‘zbekiston va Qozog‘iston o‘rtasidagi savdo, transport, energetika va yuqori texnologiyalar yo‘nalishidagi hamkorlikni kuchaytirish, shuningdek, yaqin yillarda o‘zaro savdoni 10 milliard dollarga yetkazish choralariga alohida e’tibor qaratildi.
Tomonlar hududlararo aloqalar faollashgani, o‘tgan yili tovar ayirboshlash hajmi 5 milliard dollarga yetganini qayd etdi. Avtomobilsozlik, logistika, qurilish materiallari, elektrotexnika, kimyo va geologiya sohalarida yangi loyihalar ko‘rib chiqildi. Transport yo‘laklarini rivojlantirish, chegaradagi infratuzilmani modernizatsiya qilish hamda “yashil” energiya tashabbuslarini ilgari surish masalalari ham kun tartibidan o‘rin oldi.
Shuningdek, yetakchilar Qambaro‘ta gidroelektr stansiyasi qurilishi kabi yirik mintaqaviy loyihalarni jadallashtirish, suv resurslaridan oqilona foydalanish, innovatsiyalar, kosmik texnologiyalar, raqamlashtirish va turizm yo‘nalishlarida hamkorlikni kengaytirishga kelishib oldi. Muzokaralar yakunida hukumatlarga erishilgan kelishuvlar ijrosi bo‘yicha “yo‘l xaritasi” ishlab chiqish topshirildi.
