Қашқадарё ва Андижон вилоятларида кучли таъсир қилувчи дори воситалари савдоси билан шуғулланган шахслар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Қарши шаҳрида ўтказилган тезкор тадбирда фуқаро З.Қ. 29 дона капсула ҳамда 60 дона “Gabaten” номли кучли таъсир қилувчи дори воситаларини 500 АҚШ долларига сотган вақтида ашёвий далиллар билан ушланган.
Шунингдек, Андижон вилояти Улуғнор туманида ўтказилган тадбирда фуқаро Ж.А. фуқаро М.Х.га хорижда ишлаб чиқарилган 4 дона “Регапен” ва 1 дона “Тропикамид” дориларини 670 минг сўмга сотаётганида қўлга олинган.
Ҳолатлар юзасидан Жиноят кодексининг 251-1-моддаси билан жиноят ишлари қўзғатилган. Тергов ҳаракатлари давом этмоқда.
