Бугун, 26 март куни Россиянинг Челябинск шаҳридаги 32-мактабда 9-синф ўқувчиси томонидан содир этилган отишма оқибатида ўқитувчи ва ўқувчилар жабрланди.
Маълум қилинишича, 15 ёшли ўқувчи дарс вақтида синфга кириб, аввал икки ўқитувчига газ пуркагич ишлатган, сўнг эса синфдош қизга ўқ узган. Кейин қочишга уринган вақтда ойнадан сакраб, оёғини синдирган.
Ҳужумчи ва жабрланган ўқувчи шифохонага ётқизилган. Ўқитувчилардан бирига кимёвий куйиш ташхиси қўйилган.
Дастлабки маълумотларга кўра, ўқувчи илгари тинч ва жиддий бўлган, каратэ билан шуғулланган. Ҳодисанинг эҳтимолий сабаби синфдош қизга нисбатан рашк бўлгани айтилмоқда.
Россия Федерацияси Тергов қўмитаси мазкур ҳолат юзасидан қасддан ўлдиришга уриниш моддаси бўйича жиноят иши қўзғатган.
Ҳодисадан сўнг мактаб вақтинча ёпилиб, ўқувчилар уйларига жўнатилган.
