Ўзбекистонда Ташаббусли бюджетнинг 2026 йил биринчи мавсуми доирасида ўтказилган овоз бериш якунланди.
Қайд этилишича, лойиҳалар учун жами 10 миллион 284 мингдан ортиқ овоз берилган. Жараён давомида фуқаролардан 21 049 та ташаббус келиб тушган бўлиб, шундан 17 424 таси саралаш босқичидан ўтган.
Овоз бериш натижаларига кўра, 1996 та лойиҳа ғолиб деб топилди. Уларни амалга ошириш учун 3 триллион 5 миллиард 827 миллион сўмдан ортиқ маблағ ажратилиши режалаштирилган.
Ғолиб лойиҳалар орасида энг катта улуш ички йўлларни таъмирлашга тўғри келади — 868 та лойиҳа. Шунингдек, мактабларни таъмирлаш ва уларнинг моддий-техник базасини ривожлантириш бўйича 566 та, соғлиқни сақлаш муассасаларини таъмирлаш ҳамда жиҳозлашга доир 163 та лойиҳа ғолиб бўлган.
Энг кўп овоз тўплаган айрим ҳудудларда аҳоли ғалабани байрамона руҳда нишонлагани, мусиқа, рақс ва концерт дастурлари ташкил этилгани қайд этилди.
Маълумот учун, овоз бериш жараёни 11 мартдан 20 мартга қадар давом этди. Мазкур лойиҳа доирасида фуқаролар маҳаллий бюджет маблағларининг бир қисмини тақсимлашда бевосита иштирок этиш имкониятига эга.
