Yonhap News Agency хабарига кўра, кеча — 8 март куни Seosan шаҳрининг Жигок-меон туманида жойлашган металл эритиш заводида 50 ёшли Ўзбекистон фуқароси бахтсиз ҳодиса оқибатида ҳалок бўлди.
Маълум қилинишича, маҳаллий вақт билан соат 21:46 атрофида Seosan Autovalley саноат зонасидаги корхонада ишлаётган эркак юк кўтаргич (форклифт) билан тўқнашиб, иш материаллари остида қолиб кетган.
Жабрланувчи юрак тўхташи ҳолатида қутқарилиб, 119 тез ёрдам хизмати томонидан яқин атрофдаги шифохонага олиб борилган. Бироқ шифокорлар унинг ҳаётини сақлаб қола олмаган.
Қайд этилишича, мазкур заводда доимий ишчилар сони 5 кишидан ортиқ бўлгани сабабли ҳодиса “Оғир саноат бахтсиз ҳодисаларини жазолаш тўғрисида”ги қонун доирасида кўриб чиқилмоқда.
Полиция ва меҳнат органлари дастлабки тахминга кўра, юк кўтаргич ҳайдовчиси ҳаракат вақтида олдинда турган ишчини пайқамай қолган бўлиши мумкинлигини билдириб, ҳодиса юзасидан тергов олиб бормоқда.
