24 октябрь куни Брюссель шаҳрида Ўзбекистон Президенти Шавкат Мирзиёев, Европа кенгаши Президенти Антониу Кошта ва Европа комиссияси Президенти Урсула фон дер Ляйен иштирокида Ўзбекистон Республикаси билан Европа Иттифоқи ўртасида Кенгайтирилган шериклик ва ҳамкорлик тўғрисидаги битим (EPCA) имзоланди. Бу ҳақда Президент матбуот хизмати хабар берди.
Янги ҳужжат 1996 йилдаги Шериклик ва ҳамкорлик битимини алмаштириб, икки томонлама муносабатларнинг ҳуқуқий асосини янгилайди ва кенгайтиради.
EPCA 9 бўлим, 356 модда ва 14 иловадан иборат бўлиб, сиёсий мулоқот, савдо ва инвестициялар, фан ва таълим, инновациялар, атроф-муҳит ва иқлим ўзгариши каби соҳаларни қамраб олади.
Битим Ўзбекистон ва Европа Иттифоқи муносабатларида янги босқични бошлаб бериб, ҳамкорликни мисли кўрилмаган даражага олиб чиқиши кутилмоқда.
Эслатиб ўтамиз, Шавкат Мирзиёев кеча расмий ташриф билан Брюссельга етиб борган, уни рафиқаси Зироатхон Мирзиёева ҳамроҳлик қилган.
