15 сентябрь куни Тошкент шаҳри Миробод туман судида собиқ қишлоқ хўжалиги вазири Азиз Воитов ва яна 61 нафар шахсга нисбатан жиноят иши бўйича биринчи инстанция суд қарорлари эълон қилинди. Суд Воитовни жуда кўп миқдорда ўзлаштириш ёки растрата йўли билан талон-торож қилишда айбдор деб топди.
Унга нисбатан 3 йил муддатга ахлоқ тузатиш ишлари, ойлик иш ҳақининг 30 фоизини давлат даромадига ушлаб қолиш ва БҲМнинг 400 баравари миқдорида жарима жазоси тайинланди. Шунингдек, 3 йил раҳбарлик ва моддий жавобгарликка доир лавозимларда ишлаш ҳуқуқидан маҳрум этилди.
Суд баёнотида таъкидланишича, етказилган зарар тўлиқ қоплангани учун унга озодликдан маҳрум этиш жазоси қўлланилмади. Суд ҳужжатларига кўра, Воитов ҳисоб рақамидаги депозит маблағларини давлат даромадига ўтказишга рози бўлган.
Айни иш доирасида Қишлоқ хўжалигида хизматлар кўрсатиш агентлигининг собиқ директори Ҳусниддин Каримов 8 йил 6 ой озодликдан маҳрум этилди.
Қолган 60 нафар судланувчидан:
9 нафари озодликдан маҳрум қилинди,
51 нафарига озодликдан маҳрум қилиш билан боғлиқ бўлмаган жазо тайинланди.
Эслатиб ўтамиз, Азиз Воитов 2023 йил октябрь ойида вазирлик лавозимидан озод этилган, декабрь ойида унга расман айб эълон қилинган эди.
