Ҳиндистонда 5 минг километрдан ортиқ масофага учувчи ва ядровий жанговар каллакларни ташишга қодир “Агни-5” баллистик ракетасини муваффақиятли синовдан ўтказди. Бу ҳақда CNN хабар берди.
Ҳиндистон Мудофаа вазирлиги 20 август куни ушбу мавзу юзасидан расмий баёнот берган. Маълум қилинишича, синов Одиша штатида ўтказилган бўлиб, ракета барча техник ва операцион талабларга тўлиқ жавоб берган.
Ракета синови Ҳиндистон бош вазири Нарендра Модининг сўнгги йилларда илк бор Хитойга ташриф буюришга тайёрланаётган бир пайтда бўлиб ўтмоқда. Ушбу ташриф Шанхай ҳамкорлик ташкилоти саммити доирасида август охирида Хитойнинг Тянсзин шаҳрида бўлиб ўтиши режалаштирилган.
Хитой ташқи ишлар вазири Ван И июль ойида Ню Деҳлига ташриф буюрганди. Шунингдек, аввалроқ Моди ва Си Сзинпин 2024 йил октябрь ойида Россияда бўлиб ўтган BRICS саммитида норасмий учрашув ўтказганди. Ушбу ижобий силжишлар орасида икки давлат орасида 2020 йилда COVID пандемияси сабаб бекор қилинган тўғридан-тўғри тижорий авиақатновларнинг қайта тикланиши, ҳинд сайёҳларига Тибетдаги зиёрат жойлари очилиши ва турист визаларининг қайта берилиши бор.
“Агни-5” ракетаси Ҳиндистоннинг ядро қуролига эга бошқа қўшниси — Покистонга қарши мудофаа стратегиясининг ҳам муҳим қисми саналади. Икки давлат ўртасида 2025 йил баҳорида сўнгги ўн йилликдаги энг кескин ҳарбий тўқнашувлардан бири содир бўлган, яъни икки томон бир-бирининг ҳудудига ракеталар билан зарба берган.
