Ижтимоий тармоқларда номаълум шахс автотураргоҳда турган автомашинани устига сакраб, уни ҳайдаб кетганлиги акс этган видео тарқалиб, турли муҳокамаларга сабаб бўлмоқда. Мазкур ҳолат юзасидан Тошкент шаҳар ИИББ маълумот берди.
Унга кўра, жорий йилнинг 9 август куни соат тахминан 08:00 ларда Бектемир туманидаги савдо мажмуаларининг бирида, 1991 йилда туғилган Б.К. маст ҳолатда, таниши 1996 йилда туғилган Н.Б. га тегишли “Ваз-2108” русумли автомашинани устига автотураргоҳ деворидан сакраб том қисмига шикаст етказган. Шундан сўнг, у танишининг автомашинасини автотураргоҳ ҳудудида бошқарган. Аниқланишича, фуқаро Б.К. маст ҳолатда бўлганлиги сабабли савдо мажмуасига киритилмаган. Кўрилган тезкор чора-тадбирлар натижасида фуқаро Б.К. ушланган.
Мазкур ҳолат юзасидан ушбу фуқарога нисбатан Ўзбекистон Республикаси Маъмурий жавобгарлик тўғрисидаги кодексининг 200-моддаси (“Ўзбошимчалик”), 183-моддаси (“Майда безорилик”) ва 194-моддаси (“Ички ишлар органлари ходимининг қонуний талабларини бажармаслик”) аломатлари билан маъмурий баённома расмийлаштирилган.
Тўпланган ҳужжатлар қонуний чора кўриш учун Жиноят ишлари бўйича Бектемир тумани судига юборилган, дейилади хабарда.
