АҚШнинг собиқ президенти Дональд Трамп ўзидан аввалги давлат раҳбари Барак Обамани давлатга хиёнат қилганликда айблади. Унинг сўзларига кўра, Обама ва унинг яқин ҳамкорлари 2020-йилги президент сайловларига таъсир ўтказишга уринишган.
"Бу хиёнат эди. Улар сайловларни ўғирлашга ҳаракат қилишди. Улар сайлов жараёнини адаштиришга ҳаракат қилишди. Улар шундай ишлар қилди-ки, буни ҳатто бошқа давлатларда ҳам тасаввур қилиш қийин", — дейди Трамп Германиянинг DW нашрига берган интервьюсида. У Обамани "бош жиноятчи" деб атади.
Трамп ўз айбловларини Миллий разведка директори Тулси Габбард тайёрлаган ҳисоботга асослади. Ҳисоботда айтилишича, Обама маъмурияти Россия томонидан 2016 йилги сайловларга таъсир қилишга оид маълумотларни "сохталаштирган ва сиёсийлаштирган".
"Россияда АҚШ сайловларини бузиш нияти ҳам, имконияти ҳам бўлмаган", — дейилади Габбард хулосасида.
Бироқ CNN телеканали таъкидлашича, Габбард ҳисоботи аввалги текширувлар натижаларини инкор этмайди. Уларга кўра, Россия ҳақиқатдан ҳам Хиллари Клинтонни обрўсизлантириш ва сайловчиларга таъсир ўтказиш учун ахборот кампаниялари, киберҳужумлар каби усуллардан фойдаланган. Аммо Россия сайлов инфратузилмасини ёки овоз бериш натижаларини бевосита ўзгартиришга ҳаракат қилмаган.
Барак Обама матбуот котиби Патрик Роденбуш эса Трампнинг баёнотига жавобан шундай деди:
"Президентлик лавозимига ҳурмат сифатида биз одатда бунақа муттасил аҳмоқона ва ёлғон гап-сўзларга жавоб бермаймиз. Аммо бу сафарги даъволар шунчалик ҳақоратли ва беасоски, жавобсиз қолдириб бўлмайди".
Унинг таъкидлашича, "бундай кулгили айбловлар ҳеч қандай асосга эга эмас ва Габбард ҳисоботида ҳам Россиянинг 2016 йилда таъсир ўтказишга ҳаракат қилгани инкор этилмаган".
