Сурхондарё вилоятида фуқаролар ноқонуний равишда илон сақлаб келаётгани аниқланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.
Маълум қилинишича, 6 бош Ўрта Осиё кобраси ва 17 бош шарқ бўғма илони жами 23 бош илон табиатга қайтарилган.
Мазкур илонлар ўтказилган рейдлар давомида аниқланган. Улар фуқаролар томонидан ноқонуний сақлаб келинаётган бўлган ва олиб қўйилиб, Тошкент ҳайвонот боғига вақтинча сақлаш учун топширилган. Шундан сўнг, Фанлар академияси Зоология институтининг илмий хулосаси асосида илонлар “Сурхон” давлат қўриқхонасининг Кампиртепа, Шержон ва Шолкон ҳудудларига қўйиб юборилган.
Маълумот учун, Ўрта Осиё кобраси ва Шарқ бўғма илони заифга яқин, мозаик тарқалган тур сифатида Ўзбекистон Қизил китоби ҳамда CITES’нинг II иловасига киритилган. Қизил китобдаги маълумотларга кўра, Ўрта Осиё кобраси ҳозирда айрим яшаш жойларида бутунлай йўқ бўлиб кетган, қолганларида эса сони кам учрайди. Шарқ бўғма илонининг сони ҳақида аниқ маълумотлар йўқ.
