АҚШнинг Ню-Мексико штатидаги Руидсосо номли тоғли шаҳарча кучли ёмғир ва тошқин қурбонига айланди. Маҳаллий ҳокимиятга кўра, ёғингарчилик оқибатида ер кўчкилари юзага келган, кўприклар ва уйлар сувга оқиб кетган.
Айни дамда уч киши бедарак йўқолган деб топилган, бир нечта фуқаролар шифохонага ётқизилган. Руидсосо мери Линн Кроуфорднинг айтишича, тошқинлардан олдин шаҳар яқинидаги дарё шунчалик кичик бўлганки, уни ҳатто “сакраб ўтиш” мумкин эди.
Эътиборлиси, бу шаҳарча ўтган йили ҳалокатли ўрмон ёнғинларидан жиддий зарар кўрган эди.
Шу билан бирга, кучли ёмғирлар билан курашаётган қўшни Техас штатидаги ҳолат ҳам оғирлигича қолмоқда. Расмий маълумотларга кўра, тошқинлар туфайли ҳалок бўлганлар сони 109 нафарга етган, улардан деярли учдан бири – болалар. 160 дан ортиқ инсон ҳануз бедарак йўқолган.
